Char dham Yatra 2026 : શિયાળાની વિદાય સાથે જ હવે હિમાલયની પહાડીઓમાં ગુંજતા પવિત્ર મંત્રોચ્ચારનો સમય નજીક આવી રહ્યો છે. વર્ષ 2026ની ચારધામ યાત્રા (Char Dham Yatra 2026) ને લઈને શ્રદ્ધાળુઓમાં ભારે ઉત્સાહ જોવા મળી રહ્યો છે. જોકે, આ વર્ષે યાત્રાએ નીકળતા પહેલા તમારે માત્ર સામાન જ નહીં, પણ ગાડીના દસ્તાવેજોનું લિસ્ટ પણ બરાબર ચેક કરવું પડશે. ઉત્તરાખંડના પરિવહન વિભાગ (Transport Department) દ્વારા આજથી એટલે કે 18 માર્ચથી યાત્રા માટેના નવા નિયમો અમલી બનાવી દેવામાં આવ્યા છે.
Green Cardવગર યાત્રા અશક્ય!
પહાડોની વાંકીચૂકી અને સાંકડી સડકો પર ટ્રાફિક જામની સમસ્યા નિવારવા માટે સરકારે ગ્રીન કાર્ડ (Green Card) ફરજિયાત બનાવ્યું છે. આજથી જ આ કાર્ડ આપવાની પ્રક્રિયા ઓનલાઇન અને ઓફલાઇન બંને માધ્યમથી શરૂ કરી દેવાઈ છે. જો તમારી પાસે આ કાર્ડ નહીં હોય, તો ઋષિકેશથી આગળના રૂટ પર તમને પ્રવેશ મળશે નહીં. આ કાર્ડ વાહનની સુરક્ષા અને તેની ક્ષમતાનું પ્રમાણ છે.
બહારના રાજ્યોના વાહનો માટે નવો પડકાર
ગુજરાત, મહારાષ્ટ્ર કે રાજસ્થાન જેવા બહારના રાજ્યોના વાહનો (Outstation Vehicles) માટે આ વખતે ખાસ મર્યાદા નક્કી કરવામાં આવી છે. હવે અન્ય રાજ્યની કોઈ પણ ખાનગી કે કોમર્શિયલ ગાડીને ઉત્તરાખંડમાં માત્ર 15 દિવસ માટે જ રહેવાની મંજૂરી (Permission) આપવામાં આવશે. વહીવટીતંત્રનું માનવું છે કે આ નિયમથી યાત્રાના રૂટ પર વાહનોનો ભરાવો ઓછો થશે. આ સાથે જ દરેક ડ્રાઈવરે ઓનલાઇન પોર્ટલ પરથી ટ્રિપ કાર્ડ (Trip Card) ડાઉનલોડ કરવું પડશે, જેમાં પ્રવાસીઓની સંખ્યા અને ડ્રાઈવરની વિગતો હશે.
વાહનનું ફિટનેસ અને અનુભવી ડ્રાઈવર અનિવાર્ય
પહાડોમાં અકસ્માતનું જોખમ ઘટાડવા માટે આ વખતે વાહનના ફિટનેસ સર્ટિફિકેટ (Fitness Certificate) પર ખાસ ભાર મૂકવામાં આવ્યો છે. જો તમારી ગાડીમાં ટાયર, બ્રેક કે એન્જિનમાં કોઈ ખામી જણાશે તો ઋષિકેશ ચેકપોસ્ટ પરથી જ યુ-ટર્ન લેવો પડશે. વધુમાં, પહાડી વિસ્તારોમાં ડ્રાઈવિંગનો અનુભવ ન હોય તેવા ડ્રાઈવરોને પણ મુશ્કેલી પડી શકે છે. યાત્રિકોએ ઘર છોડતા પહેલા જ અધિકૃત પોર્ટલ પર રજીસ્ટ્રેશન (Registration) કરાવી લેવું જોઈએ જેથી છેલ્લી ઘડીએ કોઈ તકલીફ ન પડે.
યાદ રાખજો, ચારધામની યાત્રા ભક્તિની સાથે શિસ્ત અને નિયમોના પાલનની પણ કસોટી છે. તો તમારી પવિત્ર સફર શરૂ કરતા પહેલા આ તમામ દસ્તાવેજો તૈયાર કરી લો!