North Korea Election :  વિશ્વના સૌથી રહસ્યમય દેશ ઉત્તર કોરિયામાં (North Korea) ફરી એકવાર સત્તાનું એ જ ચિત્ર જોવા મળ્યું છે જેની વર્ષોથી આદત છે. 15 માર્ચના રોજ યોજાયેલી સંસદીય ચૂંટણીમાં (Parliamentary Elections) સરમુખત્યાર કિમ જોંગ ઉનની પકડ વધુ મજબૂત બની છે. આ ચૂંટણી લોકશાહીનો ઉત્સવ ઓછી અને કિમની તાકાતનું પ્રદર્શન વધુ સાબિત થઈ છે.

આંકડા જે દુનિયાને ચોંકાવી દે તેવા છે

ઉત્તર કોરિયાની સરકારી ન્યૂઝ એજન્સી KCNA ના અહેવાલ મુજબ, આ ચૂંટણીમાં 99.99% મતદાન (Voter Turnout) નોંધાયું છે. આ આંકડો સાંભળવામાં અશક્ય લાગે, પણ કિમના શાસનમાં આ સામાન્ય છે. 15મી સુપ્રીમ પીપલ્સ એસેમ્બલીની (Supreme People’s Assembly) તમામ 687 બેઠકો પર કિમ જોંગ ઉનની ‘કોરિયન વર્કર્સ પાર્ટી’ (Korean Workers’ Party) અને તેના સમર્થિત ઉમેદવારોએ ભવ્ય વિજય મેળવ્યો છે.

 વિરોધ પક્ષ જેવું કંઈ છે જ નહીં!

આ દેશની ચૂંટણી પ્રક્રિયા વિશ્વના અન્ય દેશો કરતા સાવ અલગ અને વિચિત્ર છે:

• એક બેઠક, એક ઉમેદવાર: દરેક મતવિસ્તારમાં માત્ર એક જ ઉમેદવાર હોય છે, જે અગાઉથી કિમની પાર્ટી દ્વારા નક્કી કરાયેલ હોય છે.

• હા કે ના નો વિકલ્પ: મતદારો પાસે કોઈ અન્ય ઉમેદવાર પસંદ કરવાનો મોકો નથી હોતો, તેમણે માત્ર આપેલા ઉમેદવારની સામે ‘હા’ કે ‘ના’ કહેવાનું હોય છે.

• 0.07% નો નવો આંકડો: રસપ્રદ વાત એ છે કે, 1957 પછી પ્રથમ વખત સરકારે સ્વીકાર્યું છે કે 0.07% લોકોએ ઉમેદવારને નકાર્યા છે, જે નેતૃત્વમાં થતા આંતરિક ફેરફારનો સંકેત હોઈ શકે છે.

પરમાણુ શક્તિ અને ભવિષ્યની રણનીતિ 

આગામી 22 માર્ચના રોજ નવી એસેમ્બલીની પ્રથમ બેઠક મળશે. જેમાં કિમ જોંગ ઉનને ફરીથી ‘સ્ટેટ અફેર્સ કમિશન’ ના ચેરમેન તરીકે નિયુક્ત કરાશે. આ નવી ટર્મમાં કિમ જોંગ ઉન પોતાના પરમાણુ હથિયારો (Nuclear Weapons) અને લાંબા અંતરની મિસાઈલોના (Long-range Missiles) પ્રોગ્રામને વધુ આક્રમક બનાવશે તેવી પૂરી શક્યતા છે. વૈશ્વિક પ્રતિબંધો છતાં કિમનું શાસન અટલ હોવાનો આ ચૂંટણીએ પુરાવો આપ્યો છે.

આ પણ વાંચો : હવાઈ મુસાફરોની બલ્લે-બલ્લે! હવે ફ્લાઈટમાં મનપસંદ સીટ માટે નહીં ખર્ચવા પડે વધારાના પૈસા!