Donald Trump Gold Coin : અમેરિકાના ઇતિહાસમાં 4 જુલાઈ 1776નો દિવસ સુવર્ણ અક્ષરે અંકિત છે, જ્યારે 13 સંસ્થાનવાસીઓએ બ્રિટનથી આઝાદીની જાહેરાત કરી હતી. હવે, વર્ષ 2026માં આ ઐતિહાસિક ઘટનાના 250 વર્ષ (250th Anniversary) પૂર્ણ થવા જઈ રહ્યા છે. આ મહાન અવસરને યાદગાર બનાવવા માટે યુએસ મિન્ટ દ્વારા એક ખાસ સોનાનો સિક્કો બહાર પાડવાની તૈયારી કરવામાં આવી છે, પરંતુ આ સિક્કો અત્યારે અમેરિકાની સત્તાવાર ગલીઓમાં ચર્ચા અને વિવાદનો વિષય બન્યો છે.
આ પણ વાંચો : 1 એપ્રિલથી ATM માંથી કેશ ઉપાડવું મોંઘું પડશે? જાણો લાગુ થઈ રહેલા નવા નિયમો વિશે
સિક્કાની વિશેષતા અને ટ્રમ્પનું અનોખું અંકન
આ કોઈ સામાન્ય સિક્કો નથી, પરંતુ 24 કેરેટ શુદ્ધ સોનાનો સ્મારક સિક્કો (24 Karat Gold Commemorative Coin) છે. આ સિક્કાની સૌથી આકર્ષક અને વિવાદાસ્પદ બાબત એ છે કે તેના પર વર્તમાન રાષ્ટ્રપતિ ડોનાલ્ડ ટ્રમ્પ (Donald Trump) ની તસવીર હશે. સિક્કાની ડિઝાઇનમાં ટ્રમ્પને વ્હાઇટ હાઉસના ઐતિહાસિક ‘રિઝોલ્યુટ ડેસ્ક’ (Resolute Desk) પર નમેલા અને મક્કમતાથી મુઠ્ઠી ભીંસેલી મુદ્રામાં બતાવવામાં આવ્યા છે. આ તસવીર ટ્રમ્પની ‘ફાઇટર’ ઇમેજને ઇતિહાસમાં કાયમી કરવાનો પ્રયાસ માનવામાં આવે છે.
કાયદો શું કહે છે? જીવિત રાષ્ટ્રપતિની તસવીર પર પ્રતિબંધ
અમેરિકન કાયદા (US Law) મુજબ, સામાન્ય રીતે ચલણી સિક્કાઓ કે નોટો પર કોઈ પણ જીવિત વ્યક્તિ કે રાષ્ટ્રપતિની તસવીર છાપી શકાતી નથી. જોકે, ટ્રેઝરી વિભાગે (Treasury Department) આ મામલે એક વચગાળાનો રસ્તો કાઢ્યો છે. અધિકારીઓના મતે, આ સિક્કો બજારમાં ખરીદ-વેચાણ માટેનું સામાન્ય ચલણ નથી, પરંતુ તે માત્ર સિક્કાઓનો સંગ્રહ કરનારા કલેક્ટર્સ (Collectors) માટેનું એક સ્મારક છે. આ તર્કને આધારે તેને કાયદાકીય પ્રતિબંધોમાંથી મુક્તિ મળી શકે છે.
રાજકીય સંગ્રામ: લોકશાહી કે વ્યક્તિગત પ્રચાર?
આ નિર્ણયે અમેરિકાના રાજકારણમાં બે ભાગ પાડી દીધા છે:
-
સમર્થકોનો પક્ષ: ટ્રેઝરીના અધિકારી બ્રન્ડન બીચે જણાવ્યું કે, “આ સિક્કો આપણી લોકશાહી અને 250 વર્ષના વારસાનું પ્રતીક છે. ટ્રમ્પ આ સમયે અમેરિકન ગૌરવના પ્રતીક તરીકે શ્રેષ્ઠ પસંદગી છે.”
-
વિરોધ પક્ષનો પ્રહાર: ડેમોક્રેટિક પાર્ટી (Democratic Party) આને ટ્રમ્પના અહંકારનું પ્રતીક માની રહી છે. સીનેટર જેફ મર્કલીએ આકરા શબ્દોમાં કહ્યું કે, “સિક્કાઓ પર ચહેરા રાજાઓ અને સરમુખત્યારોના હોય છે, લોકશાહી નેતાઓના નહીં.”
ભૂતકાળનો ઈતિહાસ અને ભવિષ્યની યોજના
પહેલીવાર નથી જ્યારે કોઈ જીવિત રાષ્ટ્રપતિ સિક્કા પર દેખાયા હોય. વર્ષ 1926માં, આઝાદીના 150 વર્ષ પૂર્ણ થવા પર રાષ્ટ્રપતિ કેલ્વિન કૂલીજ (Calvin Coolidge) જ્યોર્જ વોશિંગ્ટન સાથે સિક્કા પર જોવા મળ્યા હતા. વર્ષ 2026માં માત્ર ટ્રમ્પના ફોટાવાળા જ નહીં, પણ ‘લિબર્ટી બેલ’ અને 1776-2026 અંકિત હોય તેવા અન્ય મેડલ પણ બહાર પાડવામાં આવશે.
આ સિક્કો ભલે ટ્રેઝરી માટે ગૌરવનો વિષય હોય, પણ ટીકાકારો તેને ટ્રમ્પ વહીવટીતંત્રની પોતાની વિરાસતને રાષ્ટ્રીય પ્રતીકો સાથે જોડવાની એક સુનિયોજિત રણનીતિ માની રહ્યા છે.
આ પણ વાંચો : ઈરાન-ઈઝરાયેલ યુદ્ધ વચ્ચે પીએમ મોદી એક્શનમાં, ભારતની ઉર્જા સુરક્ષા પર મોટી બેઠક, જાણો શું થઈ ચર્ચા?